ސަރުކާރަށް އެއް އަހަރު ފުރުން ފާހަގަ ކުރުމުގެ ގޮތުން އޯޕަންޑޭ އެއް ލޭބަރ ރިލޭޝަންސް އޮތޯރިޓީން ބާއްވައިފިއެވެ. މި އޯޕަންޑޭ އަކީ ދާޚިލީ ސަލާމަތާއި ފަންނިއްޔާތާ ބެހޭ ވުޒާރާ ގެ އިސްނެންގެވުމުގެ މަތިން، އެ ވުޒާރާގެ ދަށުން ހިންގަމުންދާ ތަންތަނުން ކުރިއަށް ގެންގޮސްފައިވާ އިވެންޓެކެވެ.
މި އިންވެންޓްގެ މައިގަނޑު މަޤްޞަދަކީ ދާޚިލީ ސަލާމަތާއި ފަންނިއްޔާތާ ބެހޭ ވުޒާރާގެ ދަށުން ހިންގަމުންދާ ތަންތަނާއި ރައްޔިތުންނާ އޮންނަ ގުޅުން ބަދަހިކޮށް، ރައްޔިތުންނަށް ބޭނުންވާ މަޢުލޫމާތުތައް ފަސޭހަކަމާއެކު ލިބޭނެ މަގެއް ފަހިކޮށްދިނުމެވެ.
މިގޮތުން، މި އޮތޯރިޓީން ކުރިއަށް ގެންދިޔަ އޯޕެންޑޭގައި، އޮތޯރިޓީގެ މެންޑޭޓްގެ ތެރެއިން ކުރަމުންގެންދާ މަސައްކަތްތަކާގުޅޭ މަޢުލޫމާތު ރައްޔިތުންނަށް ހިއްޞާކޮށް، ވަޒީފާއާބެހޭ ޤާނޫނާއި، އެ ޤާނޫނުގެ ދަށުން ހެދިފައިވާ ގަވާއިދުތަކާ ގުޅިގެން ރައްޔިތުން އޮޅުންފިލުވަން ބޭނުންވާ މަޢުލޫމާތު ވަނީ ފޯރުކޮށްދީފައެވެ. މީގެ އިތުރުން، މި އޮތޯރިޓީގެ މަސައްކަތް އިތުރަށް ތަރައްޤީކުރުމަށް، އާއްމުންގެ ޚިޔާލު ވަނީ ހޯދާފައެވެ.
އާންމުންނަށް ހުޅުވާލައިގެން ކުރިއަށް ގެންދެވުނު މި އޯޕަންޑޭ ކުރިއަށް ގެންގޮސްފައިވަނީ 2024 ނޮވެންބަރު 20 ވީ ބުދަ ދުވަހުގައެވެ. މި އޯޕަންޑޭ ގައި މި އޮތޯރިޓީއަށް ވަޑައިގެންނެވި ގިނަ ޢަދަދެއްގެ ދިވެހި އަދި ބިދޭސީ މަސައްކަތްތެރިންނާއި، ވަޒީފާދޭ ފަރާތްތަކުގެ ސުވާލުތަކަށް ޖަވާބު ދެވިފައިވެއެވެ.
ސަރުކާރަށް އެއް އަހަރު ފުރުން ފާހަގަ ކުރުމުގެ ގޮތުން 2024 ނޮވެންބަރު 22 ވާ ހުކުރު ދުވަހު ހުޅުމާލެ ސެންޓްރަލް ޕާކު ސަރަހައްދުގައި ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ކުރިއަށް ގެންދިއުމަށް ރާއްވަވާފައިވާ ހޯމް ޓީމް ޢާއިލީ ހަވީރުގައި މި އޮތޯރިޓީން ބައިވެރިވުމަށް ވަނީ ނިންމަވާފައެވެ.
