ފޮޓޯ: މިނިސްޓްރީ އޮފް އިސްލާމިކް އެފެއަރޒް
10 ޖަނަވަރީ 2025 ވަނަ ހުކުރު ދުވަހުގެ ޚުޠުބާގައި ވަޒީފާއާބެހޭ ޤާނޫނުގައި ހިމެނިފައިވާ ބައިތަކާ ބެހޭގޮތުން އަލިއަޅުވާލާ ނަޞޭޙަތްތެރިވެއްޖެއެވެ. އެގޮތުން، ވަޒީފާގެ އެއްބަސްވުމަކީ ހަމައެކަނި މުސާރަ ލިބިގަތުމަށްޓަކައި ވެވޭ އެއްބަސްވުމަކަށް ނުހެދުމަށާއި، ވަޒީފާގެ ބަޔާނާ އެއްގޮތަށް މުވައްޒަފުން މަސައްކަތްކުރުމަށް ޚުޠުބާގައި ނަޞޭޙަތްތެރިވެފައިވެއެވެ. މީގެ އިތުރުން، ވަޒީފާއާބެހޭ ޤާނޫނުގެ 13 ވަނަ މާއްދާގައި ވަޒީފާ އަދާކުރާފަރާތާއި ވަޒީފާދޭފަރާތާ ދެމެދު އެކުލަވާލާ ވަޒީފާގެ އެއްބަސްވުމާ ބެހޭގޮތުން އޮންނަ މާއްދާއާ އެއްގޮތަށް އިސްލާމްދީނުގައި މިކަން އޮންނަ ގޮތް ސާފުކޮށް ބުނެދީފައި ވެއެވެ.
ވަޒީފާގެ މާޙައުލުގެ ތެރެއިން ޚިދުމަތަށް އެދޭފަރާތްތަކަށް އޯގާތެރިކަމާއެކު ޚިދުމަތް ފޯރުކޮށްދިނުމަށާއި، މަސައްކަތް ތަރުތީބު ކުރުމާއި ބެހޭގޮތުން ކީރިތި މާތް ނަބިއްޔާ ﷺ ގެ ޙަދީޘްފުޅެއް ގެންނަވާފައިވެއެވެ. ޙަދީޘްފުޅުގެ މާނައިގައި ވަނީ “ހަމަކަށަވަރުން ތިޔަބައިމީހުންކުރެ މީހަކު މަސައްކަތެއް ކުރާނަމަ، އެކަމެއް ވީ އެންމެ ފުރިހަމައަށް ކުރުމަށް މާތް ﷲ ލޯބިވެވޮޑިގަންނަވައެވެ.”
ހަމައެހެންމެ، މަސައްކަތްކުރުމަށް ބޭނުންކުރެވޭ ވަޞީލަތްތަކާއި، ވެސް ވަޒީފާގައި ހިފަހައްޓަންޖެހޭ ސިއްރުތަކަކީ، މުވައްޒަފުން ރައްކާތެރިވާންޖެހޭ އަމާނާތްތަކެއްކަމަށް ޚުޠުބާގައި ބަޔާންކޮށްފައިވެއެވެ. އެހެންކަމުން، މި އަމާނާތްތަކަށް ރައްކާތެރިވުމަށާއި ވަޒީފާގެ މުހިއްމު ވަގުތުތައް އޮފީހުން ބޭރުގައި އަމިއްލަ ކަންކަމުގައި ހޭދަނުކުރުމަށް ޚުޠުބާގައި ބާރުއަޅާފައިވެއެވެ. އަދި، މަސައްކަތްކުރުމަށް ބޭނުންކުރެވޭ ވަޞީލަތްތައް ނަހަމަ ގޮތުގައި ބޭނުންކުރާނަމަ، އެކަން މާތް ﷲ ދެނެވޮޑިގެންވާކަން ހަނދުމަ ކުރުމަށް ޚުޠުބާގައި ގޮވާލާފައިވެއެވެ.
ކޮންމެ ވަޒީފާއެއްގައި ވެސް ޙައްޤުތަކާއި ވާޖިބުތަކެއްވާކަމަށާއި، މުވައްޒަފުގެ މައްޗަށް ވާޖިބުތަކެއްވާ ފަދައިން، ވަޒީފާދޭ ފަރާތުގެ މައްޗަށްވެސް ވާޖިބުތަކެއްވާނެކަމަށް ޚުޠުބާގައި ބަޔާންކޮށްފައިވެއެވެ. އެގޮތުން، މުވައްޒަފުގެ ސަލާމަތާއި ރައްކާތެރިކަމަށް ސަމާލުވެ، އޭނާއަށް ޙައްޤުވާ މުސާރަ އާއި އެހެނިހެން ޢިނާޔަތްތައް ޤަވާޢިދުން ދިނުމަށާއި، ވަޒީފާގެ އުޞޫލުތަކުގެ ތެރެއިން ދޭންޖެހޭ ޗުއްޓީ އާއި ހުސްވަގުތު މުވައްޒަފަށް ދިނުމުގެ އިތުރުން، މުވައްޒަފުންގެ މެދުގައި ޢަދުލުވެރިކަމާއި އޯގާތެރިކަމާއެކު މުޢާމަލާތު ކުރަންޖެހޭނޭކަމަށް ބަޔާންކޮށް، ވަޒީފާދޭ ފަރާތްތަކަށް ނަޞޭޙަތްތެރިވެފައިވެއެވެ.
