ވަޒީފާއާބެހޭ ޤާނޫނާއި، އެ ޤާނޫނުގެ ދަށުން ހެދިފައިވާ ގަވާއިދުތަކަށް ވަޒީފާދޭ ފަރާތްތަކުން ޢަމަލުކުރާ މިންވަރު ބެލުމަށް އިންސްޕެކްޝަންސްތައް ހިންގުމަށާއި، އެވެއަރނަސް ޕްރޮގްރާމްތައް ހިންގުމަށް، މި އޮތޯރިޓީން އޮގަސްޓު މަހުގެ 10 އިން 13 ވަނަ ދުވަހުގެ ނިޔަލަށް މިލަދުންމަޑުލު އުތުރުބުރިއަށް ދަތުރެއްކޮށްފިއެވެ.
މި ދަތުރަކީ ށ. ފުނަދޫގައި ހިންގަމުންދާ ވިޔަފާރިތަކާއި، އެ އަތޮޅުގައިވާ ރިސޯޓްތަކުން ވަޒީފާއާބެހޭ ޤާނޫނަށް ޢަމަލު ކުރަމުން އަންނަ މިންވަރު ބަލައި ޗެކުކުރުމަށް ކުރިއަށް ގެންދެވުނު އިންސްޕެކްޝަނެކެވެ. މިދަތުރުގައި ށ. ފުނަދޫގައި ހިންގަމުންދާ ވިޔަފާރިތައް އިންސްޕެކްޓްކޮށްފައިވީ ނަމަވެސް، މޫސުން ގޯސްވުމުގެ ސަބަބުން ރިސޯޓްތައް އިންސްޕެކްޓް ކުރެވިފަނުވެއެވެ.
މީގެ އިތުރުން، މިލަދުންމަޑުލު އުތުރުބުރީ ފުނަދޫ ކައުންސިލާއި ގުޅިގެން، އެ ރަށުގައި ވަޒީފާދީގެން މުވައްޒަފުން ގެންގުޅޭ ފަރާތްތަކަށް އަމާޒުކޮށް ވަޒީފާއާބެހޭ ޤާނޫނާއި، އެ ޤާނޫނުގެ ދަށުން ހެދިފައިވާ ގަވާއިދުތަކަށް އާންމުން ހޭލުންތެރިކުރުމަށް އެވެއަރނެސް ޕްރޮގްރާމެއް ހިންގާފައިވެއެވެ.
މި ފުރުޞަތުގައި، އެވެއަރނެސް ޕްރޮގްރާމް ކުރިއަށް ގެންދިއުމަށް މިލަދުންމަޑުލު އުތުރުބުރީ ފުނަދޫ ކައުންސިލުން ދެއްވި އެއްބާރުލުން ފާހަގަކޮށް، އެ ރަށުގެ ކައުންސިލަށް ލޭބަރ ރިލޭޝަންސް އޮތޯރިޓީގެ މެނޭޖްމެންޓްގެ ނަމުގައި ޝުކުރު ދަންނަވަމެވެ.
